తెలంగాణకు కేంద్రం చేస్తున్న అన్యాయం ఇక భరించబోదని ముఖ్యమంత్రి ఎ. రేవంత్ రెడ్డి స్పష్టం చేశారు. నర్సంపేట పర్యటనలో ఆయన చేసిన ప్రసంగం కేంద్ర ప్రభుత్వంపై మాత్రమే కాకుండా, మాజీ సీఎం కేసీఆర్పై కూడా కఠిన విమర్శలు చేశారు. ప్రజలు తనకు తోడుంటే ఢిల్లీని చేరి తెలంగాణ హక్కులు సాధించేవరకు పోరాటం చేస్తానని సీఎం ఈ సందర్భంగా కేంద్ర ప్రభుత్వాన్ని హెచ్చరించారు. .
నర్సంపేటలో అభివృద్ధి శంకుస్థాపన – కేంద్రంపై నిప్పులు చెరిగిన సీఎం
నర్సంపేట నియోజకవర్గంలో రూ.508 కోట్ల విలువైన అభివృద్ధి కార్యక్రమాలకు శంకుస్థాపన చేసిన అనంతరం జరిగిన భారీ బహిరంగ సభలో రేవంత్ రెడ్డి కేంద్ర వైఖరిపై అసహనం వ్యక్తం చేశారు. తెలంగాణ అభివృద్ధికి కావాల్సిన సహకారం ఇవ్వకుండా, పదేపదే అడ్డంకులు సృష్టిస్తున్న మోదీ ప్రభుత్వాన్ని ప్రశ్నించారు. “రాష్ట్రానికి న్యాయం జరిగే వరకూ కేంద్రం తీరుపై నిలదీస్తాను. ప్రజలు ఆశీర్వదిస్తే, ఢిల్లీని ఢీకొనడానికైనా నేను సిద్ధమే” అని ఆయన తెలిపారు.
జూబ్లీహిల్స్ ఎన్నికను రెఫరెండం అంటున్నవారు ప్రజలను తప్పుదోవపట్టిస్తున్నారు
జూబ్లీహిల్స్ స్థానిక ఎన్నికలను ‘రెఫరెండం’గా ప్రచారం చేస్తున్న బీఆర్ఎస్ నేతలను సీఎం రేవంత్ తప్పుపట్టారు. “ఇంట్లో పండుకోక అబద్ధాలు చెప్పే వాళ్లు మళ్లీ అదే పనిలో పడ్డారు. జూబ్లీహిల్స్లో ప్రజలు బీఆర్ఎస్కు స్పష్టమైన హెచ్చరిక ఇచ్చారు అని అన్నారు. గ్రామ అభివృద్ధి కోరే ప్రజలు మంచి సర్పంచ్లను ఎన్నుకోవాలి” అంటూ జరగబోయే గ్రామ సర్పంచ్ ఎన్నికలను దృష్టిలో పెట్టుకుని ఆయన సూచించారు. గ్రామాల్లో యువత సర్పంచ్ ఎన్నికల్లో ముందుకు రావాలని, డబ్బు ఖర్చు చేసి గెలిచే నాయకత్వం ప్రజలకు ఉపయోగం ఉండదని ముఖ్యమంత్రి తేల్చి చెప్పారు.
“కేసీఆర్ హయాంలో వరంగల్ ఎయిర్పోర్ట్ ఆలోచన కూడా రాలేదు”
వరంగల్ భవిష్యత్తు దిశగా కాంగ్రెస్ ప్రభుత్వం తీసుకుంటున్న చర్యలను వివరించిన సీఎం రేవంత్, ఈ విషయంలో మునుపటి ప్రభుత్వ వైఫల్యాలను ఎత్తిచూపారు.
“హైదరాబాద్ మినహా ఇతర ప్రాంతాల్లో ఎయిర్పోర్ట్ నిర్మాణంపై కేసీఆర్ ఒక్క రోజైనా ఆలోచించారా? వరంగల్కు ఎయిర్పోర్ట్ అవసరమనే భావన కూడా ఆయనకు రాలేదు అని దుయ్యబట్టారు. మార్చి 31లోపు వరంగల్ ఎయిర్పోర్ట్ పనులు ప్రారంభిస్తామని ఇదే మా వాగ్దానం” అని రేవంత్ రెడ్డి స్పష్టం చేశారు.
వరంగల్ను రెండో హైదరాబాద్గా అభివృద్ధి చేస్తాం
ప్రజా సంక్షేమంపై తన ప్రభుత్వ కట్టుబాటు వివరించిన సీఎం, వరంగల్ను హైదరాబాద్ స్థాయిలో అభివృద్ధి చేస్తామని హామీ ఇచ్చారు. రాష్ట్రంలో మూడు కోట్ల మందికి రేషన్ అందిస్తున్నామని, రైతులకు 24 గంటల ఉచిత విద్యుత్ ఇస్తున్నామని గుర్తుచేశారు.
“వరి వేస్తే ఉరేయ్ అని చెప్పిన వాళ్లే ఇప్పుడు పెద్ద పెద్ద మాటలు చెబుతున్నారు అని విమర్శించారు.
నర్సంపేటకు 3000 ఇళ్లు
తన ప్రభుత్వం అమలు చేస్తున్న ఇందిరమ్మ ఇళ్ల పథకం ప్రజల హృదయాలను గెలుచుకుంటోందని సీఎం రేవంత్ పేర్కొన్నారు.
“ఎక్కడ డబుల్ బెడ్ రూం ఇళ్లు ఇచ్చారో అక్కడే బీఆర్ఎస్ నేతలు ఓట్లు అడగాలి. మేము ఇందిరమ్మ ఇళ్లు ఇచ్చిన ప్రతి ఇంట్లోనే ప్రజా ఆశీర్వాదం తీసుకుంటాం. వచ్చే ఏడాదిలో నర్సంపేటకు 3000 ఇందిరమ్మ ఇళ్లు మంజూరు చేస్తాం” అని ఆయన హామీ ఇచ్చారు.
తరతరాలుగా కుల వృత్తులతో బతికే కుటుంబాల జీవితాలను చదువు మాత్రమే మార్చగలదని, పిల్లల భవిష్యత్తు కోసం ప్రభుత్వం మరిన్ని విద్యా అవకాశాలు సృష్టిస్తుందని కూడా ఆయన చెప్పారు. మొత్తంగా రాష్ట్ర హక్కుల కోసం కేంద్రంపై పోరాటం, వరంగల్ అభివృద్ధి భవిష్యత్ ప్రణాళికలు, బీఆర్ఎస్పై విమర్శలు, గ్రామ స్థాయి నాయకత్వంపై పిలుపు—మొత్తం కలిసి తెలంగాణ రాజకీయాల్లో కొత్త దిశను సూచించే విధంగా నర్సంపేట సభలో సీఎం రేవంత్ రెడ్డి చేసిన ప్రసంగం స్పష్టం చేస్తుంది.
