‘అఖండ2’… వచ్చేస్తున్నాడు..!ఆ రెండు సినిమాలకు టెన్షన్!
‘అఖండ2’… వచ్చేస్తున్నాడు..!
ఆ రెండు సినిమాలకు టెన్షన్!
ఆర్థిక ఇబ్బందులు దాటిన బాలయ్య ‘అఖండ2’
డిసెంబర్ 5న విడుదల కావాల్సిన అఖండ2
ఆర్థిక ఇబ్బందులతో వాయిదా పడ్డ అఖండ2
డిసెంబర్ 12న సినిమా విడుదలకు సన్నాహాలు
అదే తేదీన విడుదల కావాల్సిన రెండు చిత్రాలు
విడుదల వాయిదా ఆలోచనలో నిర్మాతలు
డిసెంబర్12న అఖండ2 విడుదలతో…
‘మోగ్లీ 2025’, ‘ఈషా’ సినిమాలు విడుదల వాయిదా పడే అవకాశం
నందమూరి బాలకృష్ణ హీరోగా నటించిన పాన్ ఇండియా చిత్రం ‘అఖండ 2’ విడుదలకు అడ్డంకులు తొలగిపోయినట్లు తెలుస్తోంది. ఆర్థికపరమైన కారణాలతో వాయిదా పడిన ఈ సినిమాను డిసెంబర్ 12న ప్రేక్షకుల ముందుకు తీసుకురావడానికి నిర్మాతలు సన్నాహాలు చేస్తున్నట్లు టాలీవుడ్లో వార్తలు వినిపిస్తున్నాయి. అయితే, ఈ పరిణామం రెండు చిన్న సినిమాలను ఇబ్బందుల్లోకి నెట్టింది.
వివరాల్లోకి వెళితే, ‘అఖండ 2’ చిత్రాన్ని తొలుత డిసెంబర్ 5న విడుదల చేయాలని భావించారు. కానీ, చివరి నిమిషంలో తలెత్తిన ఫైనాన్షియల్ సమస్యల వల్ల సినిమా వాయిదా పడింది. తాజాగా ఆ సమస్యలన్నీ పరిష్కారమవడంతో, మరో మూడు రోజుల్లోనే చిత్రాన్ని థియేటర్లలోకి తీసుకురావాలని చిత్ర యూనిట్ భావిస్తున్నట్లు సమాచారం.
అయితే, ‘అఖండ 2’ డిసెంబర్ 5న విడుదల కాబోతోందని ముందు ప్రకటించడంతో… ‘మోగ్లీ 2025’, ‘ఈషా’ అనే రెండు చిన్న చిత్రాలు డిసెంబర్ 12న తమ సినిమాలను విడుదల చేసేందుకు ప్రణాళికలు రచించుకున్నాయి. ఇప్పటికే ప్రచార కార్యక్రమాలను కూడా ప్రారంభించాయి. ఇప్పుడు అనూహ్యంగా బాలయ్య సినిమా అదే తేదీకి వస్తుండటంతో, ఈ రెండు చిత్రాల నిర్మాతలు పునరాలోచనలో పడ్డారు. భారీ అంచనాలున్న ‘అఖండ 2’తో పోటీ పడటం కష్టమని భావిస్తున్న ఆ సినిమాల నిర్మాతలు…తమ సినిమాలను వాయిదా వేసుకొని కొత్త తేదీలను ప్రకటించే అవకాశం ఉందని ఇండస్ట్రీ వర్గాలు చెబుతున్నాయి.
